Juchari Uandakua /Editorial
Ireta engaksï Méxiku tua anapuechepka, ka jimini jarhasti indé iretecha enga jindeka ireta p’urhépecha, ima engaksï petángapka imeri irekuarhu, ima enga euakuarhijpekua turhixicheri janupka, iasï jamberi enga nitamakia jukari ekuatsi iumu uéxurhini enga isï ukuarhipka. Ima ukuarhikua no isku sapichu ambespti, jimbo ima petájperakua ka chutperakua mamaru jasï enga utasï no k’amakurhijka. Jimbo chumaxati úkuarhini isï, no jimajku enga jaka iretani utuksïcha, k’uratsiparini exexaka eska jarhaskaksï juchari iretarhu anapuecha engaksï ataratani jaka juchari iretani.
Ima turhixicha k’uanirhitoni k’amangarhitskua inde no sesi kambikua jimbo, no iamindu ambe indecheristi, ka engtu isïka, jindesti enga jarhaska k’amangarhitskua juchari. Exe je, eska na ima Cuiniarangari, enga jamapka intskuni iamindu ambe mitikua indeni Fray Jerónimo de Alcalá, indé enga karantapka takukata Relación de Michoacán, ka inde niatakua jimbo enga intsapka inchatspitichani p’iraspti itsï atajpetakua ka arhingani jakankurhikua Pedro, ka sanderu inde arhikuarhikua “don”, isï jimbo uspti jamani anchikuarhikuni indé Cristóbal de Olid arhikatani, indé enga kantapka ametantaparini ima k’uripuni enga irekapka Tsintsuntsani; ka no imajku ambéksï upti, jamaspti jarhoani inde atajpitini eska inchatspipiringa jini mataru ireta Jalisku, isï jimbo inde Cuiniarangari intsinaspti juramukua turhisï arhikata “Gobernador de la civdad de Mechoacan”. Isï chumaxati ukuarhini utasï, i tsimuani tembini uéxunikia, jarhastiksï sama k’uiripu p’urhepechecha engaksï intsiminhagaka anchperata ukua paru marhuakuni juramuti turhisïni, sano majku eska nitapka Cuiniarangari.
Isï jimbo, uekaparini no mirikurhini juchari xiranhua anapukua, jima jupikuarhintani uékani enga uaka exerantanitsini xangaru, enga paákatsini jima enga uakajchi juskani ka uaxajtantani juchari ierakuarhikua ka juramukua ambe jamaspka jucha sama k’uiripu p’urhépechecha uaxajtani ma anyanpiraqua ima engakchi karáuaka jucha, ima arhikuasamti Xiraŋhua. Joperu, nitamastia jukari ekuasi kuimu uéxurhini ka exexakajchi eska kanikua ambe jarhaska enga uétarhini jaka eskakchi mitiaka ka erarhintani ma ambe naenga jaka ka naenga isïka no istu no isïni, eratsinchi juchari anapu jorhekua jimbo ka istu uaxajtani juchari ambe niatakua ka ukua mintsitarhu anapu ambe jimbo. Isï jimbo jucha menderu imani anyanpiraqua eroparini menderujchi jamaka niatani ayanpini inde kantsakata jimbo engakchi arhiaka Tzandhpequa.
Kanikua jindesti juchari uandakua ka jukasti xirutsikua isï jimbo indé uandakua uapurhu ambe arhiekasïndi, exe indé tsimani ambe, na enga arhikajka: xirutsikua tza– jindesti ‘jurhia, ‘erarhi’, indé p’e (ndhpe)= enga jatsirhk’a uandakuani, ka qua, enga k’amatakujká uandakuani, majkuntaparini indé uandakuani arhisïndi: ‘ima enga tzarhitajk’a’. No jindesti materu ambe, jindesti ima ambe enga asïndajk’a eskajchi iamindi p’urhépecha, niarokajchi eratsintani, janhaskani juchari jorhenkuecharhu anapu jimbo, o eska k’uanijk’a, juchajku uni erárhintani mamaru ambe enga sesi ka no sesi jaka juchari iretechani jimbo ka na jarhaski marhuatspekua, ka istu eska iretechaksï ukasï jindeni eska na jaka uakatini tuanapu ka ionki anapu eratsikua jimbo, uni iasï anapu ambé jatsirhintani ka istu eroparini ima ma jurhia anapu enga jurhani jaka.
Indé ambeksï jindeuati i ayanperaqua iasï anapu eranharhitakua jimbo engaksï arhijk’a “formato digital” isï jimbo ini jurhitikua uénasïndi ka ixukchi jatsisïnga enga cha iamunduecha uakaksï jarhuatantsini xukutani ini ayanperaquani.
Ireta P’urhépecha 29 de agosto de 2024.
